​ប្រាសាក់ និង responsAbility លើក​កម្ពស់ការ​ផ្តល់​ឥណទាន​បៃតង​នៅ​កម្ពុជា​

ភ្នំពេញ ថ្ងៃ​ទី 31 ខែ​ឧសភា ឆ្នាំ 2018៖ ប្រាសាក់ ដែល​ជា​ស្ថាប័ន​ហិរញ្ញ​វត្ថុ​​ឈាន​មុខ​គេ​នៅ​កម្ពុជា និង Global Climate Partnership Fund (GCPF) បាន​រៀបចំ​សិក្ខា​សាលា​ស្តី​អំពី «ការ​ផ្តល់​ឥណទាន​បៃតង និង​កំណើន​ឥណទាន​បៃតង​នៅ​កម្ពុជា» ដែល​ប្រព្រឹត្ត​ទៅ​នៅ​ថ្ងៃ​ទី 24 ខែ​ឧសភា ឆ្នាំ 2018 នៅ​សណ្ឋាគារ​ភ្នំពេញ នៅ​កម្ពុជា។ គោល​បំណង​នៃ​សិក្ខា​សាលា​នេះ គឺ​ដើម្បីបង្កើត​វេទិកា​សម្រាប់​ការ​ពិភាក្សា​ជា​មួយ​ពហុ​ភាគី​ពាក់​ព័ន្ធ ការ​បង្ហាញ និង​ការ​រៀន​សូត្រ​អំពី​ការ​ផ្តល់​ឥណទាន​បៃតង​នៅ កម្ពុជា។

ព្រឹត្តិការណ៍​នេះ​ត្រូវ​បាន​អញ្ជើញ​ចូល​រួម​ក្រោម​អធិបតី​ដោយ​អ្នក​តំណាង​នៃ​ក្រសួង​បរិស្ថាន និង​មាន​ការ​ចូល​រួម​ពី​ស្ថាប័ន​ហិរញ្ញ​វត្ថុ ភ្នាក់​ងារ​ហិរញ្ញ​វត្ថុ​​អន្តរជាតិ អង្គការ​ក្រៅ​រដ្ឋាភិបាល​ជាតិ​និង​អន្តរជាតិ ដៃ​គូ​អភិវឌ្ឍន៍​អន្ដរ​ជាតិ អ្នក​ផ្តល់​សេវា​បច្ចេក​វិទ្យា​ថាមពលក​កើត​ឡើង​វិញ និង​ប្រសិទ្ធភាព​ថាមពល សមាគម​អាជីវកម្ម និង​សហគ្រាស​ខ្នាត​តូច​និង​មធ្យម ( SMEs)។

បម្រែបម្រួល​អាកាស​ធាតុ​គឺជា​ប្រធាន​បទ​សំខាន់​មួយ​នៅ​ក្នុង​ពិភព​លោក។ ប្រទេស​កម្ពុជា​ក៏​ជា​ប្រទេស​ងាយ​រង​គ្រោះ​មួយ​ផង​ដែរ​ពីការ​ប្រែប្រួល​អាកាស​ធាតុ និង​ហានិភ័យ​នៃ​គ្រោះ​មហន្តរាយ ដោយ​សារតែ​សមត្ថភាព​បន្សាំ​មាន​កម្រិត​ទាប និង​ការពឹង​ផ្អែក​យ៉ាង​ខ្លាំង​ទៅ​លើ​ធនធាន​ទឹក និង​វិស័យ​កសិកម្ម ដែល​ភាគ​ច្រើន​ពឹង​ផ្អែក​ទៅ​លើ​ដំណាំ​ស្រូវ និង​ដំណាំ​ផ្សេងៗ​ទៀត។ ទន្ទឹម​នឹង​នេះ​ដែរ រាជ​រដ្ឋាភិបាល​កម្ពុជា​បាន​បញ្ជា​ក់ពី​កាតព្វកិច្ច​របស់​ខ្លួន ក្នុង​ការ​កសាង​ជាតិ​ឲ្យ​វិ​វត្ត​ទៅ​ភាពរុង​រឿង រួម​ជា​មួយ​ការ​រីក​ចម្រើន​រយៈ​ពេល​វែង ការអភិវឌ្ឍន៍ប្រកប​ដោយ​ចីរភាព ធ្វើ​ឲ្យ​ប្រសើរ​ឡើង​នូវ​ជីវភាព​រស់​នៅ​របស់​ប្រជា​ពលរដ្ឋ និង​ការ​កាត់​បន្ថយ​ភាពក្រីក្រ​ដោយ​មាន​ការប្តេជ្ញា​ចិត្ត​ក្នុង​ការ​ការពារ​បរិស្ថាន។

ដោយ​មើល​ឃើញ​ពីសារៈ​សំខាន់​នៃ​បរិស្ថាន និរន្តរភាព​នៃ​ធនធាន​ធម្ម​ជាតិ ដែល​សមស្រប​តាម​យុទ្ធសាស្ត្រចតុកោណ​របស់​រាជ រដ្ឋាភិបាល​កម្ពុជា ប្រាសាក់​បាន​និង​កំពុង​ពង្រឹង​សមត្ថភាព​របស់​ខ្លួន​ឆ្ពោះ​ទៅ​រកការ​ការពារ​បរិស្ថាន​និង​សង្គម តាម​រយៈ​សកម្មភាព​ផ្តល់​ប្រាក់​កម្ចី និង​ការ​ធ្វើ​ប្រតិបត្តិ​ការ​របស់​ខ្លួន។ ប្រាសាក់ បាន​ចាប់​ដៃ​គូជា​មួយ​កម្មវិធី​ឡជីវឧស្ម័នថ្នាក់​ជាតិ​នៃ​ក្រសួង​កសិកម្ម រុក្ខាប្រមាញ់ និង​នេសាទ តាំង​ពីឆ្នាំ 2007 ដើម្បី​ផ្តល់​កម្ចីជីវឧស្ម័ន​ដល់​កសិករ​នៅ​តាម​ជនបទ​ក្នុង​ប្រទេស​កម្ពុជា។ ហើយ​នៅ​ឆ្នាំ 2016 ប្រាសាក់​បាន​ទទួល​ជំនួយ​បច្ចេកទេស និង​ប្រាក់​កម្ចីពី GCPF ដើម្បី​ធ្វើ​ឲ្យ​ប្រសើរ​នូវ​ផលិត​ផលឥណទាន​របស់​ខ្លួន​ដែល​ស៊ី​ទៅ​នឹង​ផលិត​ផល​នានា​ដែល​មាន​ប្រសិទ្ធភាព​ថាមពល។

ប្រាសាក់ បាន​ប្តេជ្ញា​ចិត្ត​មុតមាំ​ក្នុង​ការ​ផ្តល់​និង​អភិវឌ្ឍឥណទាន​បៃតង​បន្ថែម​ទៀត​ដល់​ប្រជាជន​នៅ​តាម​ជនបទ ដើម្បី​លើក​កម្ពស់​ជីវភាព​រស់​នៅ​របស់​ពួក​គាត់​ឲ្យ​កាន់​តែ​ប្រសើរ​ឡើង និង​ចូល​រួម​ការ​ការពារ​បរិស្ថាន​បន្ថែម​ទៀត។

គិត​ត្រឹម​ថ្ងៃ​ទី 31 ខែ​ធ្នូ ឆ្នាំ 2017 ប្រាសាក់​បាន​ផ្តល់​ប្រាក់​កម្ចីសាង​សង់​ឡជីវឧស្ម័ន​ចំនួន 8,411 ឡ ដែល​មាន​សម្ពៀតឥណទាន​ច្រើន​ជាង 5 លាន​ដុល្លារ​អាមេរិក។ ហើយ​បាន​ផ្តល់​កម្ចី​ត្រាក់ទ័រ​និង​គោយន្ត​ដល់​អតិថិជន​ចំនួន 529 នាក់ ដែល​មាន​សម្ពៀតឥណទាន​ច្រើន​ជាង 7 លាន​ដុល្លារ​អាមេរិក។ ជា​លទ្ធផល ប្រាសាក់​បាន​ចូល​រួម​ក្នុង​ការ​កាត់​បន្ថយ​ការបំភាយឧស្ម័នកាបោន​ចំនួន 1,500 តោន​ក្នុង​មួយ​ឆ្នាំ ឬ ស្មើ​នឹង 429,700 លីត្រ​នៃ​ប្រេង​ម៉ាស៊ូត​ក្នុង​មួយ​ឆ្នាំ។

The Global Climate Partnership Fund (GCPF) (responsAbility Investments AG)
The Global Climate Partnership Fund (GCPF) គឺជា​ភាពជា​ដៃ​គូឯកជន​សាធារណៈ​ដែល​មាន​លក្ខណៈ​ច្នៃ​ប្រឌិត ដើម្បី​កាត់​បន្ថយ​ការ​ប្រែប្រួល​អាកាស​ធាតុ តាម​រយៈការ​កាត់​បន្ថយ​ការបញ្ចេញ​ឧស្ម័ន​ផ្ទះ​កញ្ចក់​នៅ​ក្នុង​ទី​ផ្សារ​​កំពុង​រីក​ចម្រើន​និង​កំពុង​អភិវឌ្ឍ។ វាផ្តោត​លើការ​ផ្តល់​ហិរញ្ញប្បទាន​ដល់​ប្រសិទ្ធភាព​ថាមពល និង​គម្រោង​ថាមពលក​កើត​ឡើង​វិញ​ដោយ​ផ្ទាល់ និង​សហការ​ជា​មួយ​ស្ថាប័ន​ហិរញ្ញ​វត្ថុ​​ក្នុង​ស្រុក ដោយ​បង្កើត​ផលវិជ្ជ​មាន​សម្រាប់​បរិស្ថាន និង​សេដ្ឋកិច្ច​ក្នុង​ស្រុក។ មូលនិធិ​ភាពជា​ដៃ​គូ​អាកាស​ធាតុ​សកល គឺជា​មូលនិធិ​ដែល​មាន​មូលដ្ឋាន​នៅ​ប្រទេស​លុចសំបួ ដែល​គ្រប់​គ្រង​ដោយ​អ្នក​គ្រប់​គ្រង​ទ្រព្យ​ស្វ៊ីស​របស់ responsAbility Investments AG ដែល​ជា​អ្នក​គ្រប់​គ្រង​ទ្រព្យ​ឯកជន​ឈាន​មុខ​គេ​នៅ​ក្នុង​វិស័យ​វិនិយោគ​ទុន​សម្រាប់​ការអភិវឌ្ឍ។ សម្រាប់​ព័ត៌មាន​បន្ថែម៖ www.gcpf.lu

អំពី​ប្រាសាក់​

ប្រាសាក់​ទទួល​បាន​អាជ្ញាប័ណ្ណ​ស្រប​ច្បាប់​ជា​គ្រឹះស្ថាន​មីក្រូ​ហិរញ្ញ​វត្ថុ​​ទទួល​ប្រាក់​បញ្ញើ និង​ផ្តល់​សេវា​ហិរញ្ញ​វត្ថុ​ជា​ច្រើន​ប្រភេទ​ដល់​អតិថិជន​គោល​ដៅ​រួម​មាន៖ សេវា​ឥណទាន ប្រាក់​បញ្ញើសន្សំ ទូទាត់​វិក្កយបត្រ​ទឹក ទូទាត់​វិក្កយបត្រ​ភ្លើង ទូទាត់​ថ្លៃ​ទំនិញ​និង​សេវា ផ្ទេរ​ប្រាក់ ប្តូរ​ប្រាក់ ទិញ​កាត​ទូរស័ព្ទ សេវា​បើក​ប្រាក់​បៀវត្ស សេវា​ទូទាត់​រហ័ស សេវា​អេធីអឹម ម៉ា​ស៊ី​នឆូតកាត និង​សេវា​ធនាគារ​ចល័ត ដែល​គ្របដណ្តប់​នៅ​ទូ​ទាំង​​ប្រទេស។ សម្រាប់​ព័ត៌មាន​បន្ថែម៖ www.prasac.com.kh

​ប្រាសាក់ និង responsAbility លើក​កម្ពស់ការ​ផ្តល់​ឥណទាន​បៃតង​នៅ​កម្ពុជា​

​ប្រាសាក់ និង responsAbility លើក​កម្ពស់ការ​ផ្តល់​ឥណទាន​បៃតង​នៅ​កម្ពុជា​

​ប្រាសាក់ និង responsAbility លើក​កម្ពស់ការ​ផ្តល់​ឥណទាន​បៃតង​នៅ​កម្ពុជា​