ភ្នំពេញ ថ្ងៃទី 13 ខែឧសភា ឆ្នាំ 2022 ៖ ប្រាសាក់ ដែលជាគ្រឹះស្ថានមីក្រូហិរញ្ញវត្ថុធំជាងគេនៅកម្ពុជា និងមានភាគទុនិករឹងមាំពីប្រទេសកូរ៉េគឺ ធនាគារ KB Kookmin Bank បានដំឡើងដើមទុនចុះបញ្ជីរហូតដល់ 400 លានដុល្លារអាមេរិក ក្នុងកិច្ចខិតខំប្រឹងប្រែងត្រៀមខ្លួនកម្លាយពីគ្រឹះស្ថានមីក្រូហិរញ្ញវត្ថុទៅជាធនាគារពាណិជ្ជដ៏ធំ ពង្រីកសម្ពៀតឥណទាននិងប្រតិបត្តិការអាជីវកម្ម និងកសាងភាពខ្លាំងរឹងមាំដើម្បីបម្រើអតិថិជនដាក់ប្រាក់បញ្ញើ និងសាធារណជនឱ្យកាន់តែប្រសើរ។
លោក អ៊ុំ សមអឿន ប្រធាននាយកប្រតិបត្តិរបស់ប្រាសាក់ មានបានប្រសាសន៍ថា «ប្រាសាក់ បានធ្វើវិសោធនកម្មលក្ខន្តិកៈក្រុមហ៊ុនដើម្បីដំឡើងដើមទុនចុះបញ្ជីពី 300 លានដុល្លារអាមេរិក ដល់ 400 លានដុល្លារអាមេរិក។ ការដំឡើងដើមទុននេះនឹងជួយដល់យុទ្ធសាស្ត្រកំណើនរបស់គ្រឹះស្ថាន និងពង្រឹងជំហរនៅក្នុងទីផ្សារ។ លើសពីនេះ ក៏នឹងជួយយើងពង្រីកការផ្ដល់សេវាឱ្យកាន់តែទូលំទូលាយ និងធ្វើពិពិធកម្មផលិតផលនិងសេវាហិរញ្ញវត្ថុរបស់យើង ជាពិសេសគឺផ្នែកឌីជីថល»។
លោកបានបន្ថែមថា «យើងខ្ញុំពិតជារីករាយនិងសូមថ្លែងអំណរគុណយ៉ាងស្មោះស្ម័គ្រចំពោះ ធនាគារជាតិនៃកម្ពុជា និងក្រសួងពាណិជ្ជកម្ម ចំពោះការអនុម័តនិងទទួលស្គាល់ការដំឡើងដើមទុននេះ»។
នៅដំណាច់ត្រីមាសទី 1 ឆ្នាំ 2022 ប្រាសាក់ មានទ្រព្យសកម្មសរុបចំនួន 4.5 ប៊ីលានដុល្លារអាមេរិក កើនឡើង 21.3% បើប្រៀបធៀបនឹងត្រីមាសដូចគ្នាក្នុងឆ្នាំ 2021។ សមតុល្យប្រាក់បញ្ញើបានកើនឡើងដល់ 2.7 ប៊ីលានដុល្លារអាមេរិក ហើយសម្ពៀតឥណទានសរុបមានចំនួន 4.0 ប៊ីលានដុល្លារអាមេរិក។
